முருகன் என்ற விஜய் சேதுபதி தனது நண்பர் சூரியுடன் சேர்ந்துகொண்டு சென்னையில் சினிமாவில் நடிக்க வாய்ப்பு தேடி வருகிறார். ஒரு பப்பில் ராசி கன்னாவை பார்க்கிறார் விஜய் சேதுபதி. அங்கு இருவருக்கும் சிறிய மோதல் ஏற்படுகிறது. புகைப்பட கலைஞரான ராசி கன்னாவிடம் விஜய் சேதுபதி வசிக்கும் பகுதியை புகைப்படம் எடுக்க புராஜெக்ட் கொடுக்கின்றனர்.
அப்போது இருவருக்கும் காதல் ஏற்படுகிறது. ராசி கன்னாவின் தந்தை ரவி கிஷன் பெரிய கார்ப்பரேட் கம்பெனியின் முதலாளி. அவர் ராசி கன்னா விஜய் சேதுபதியை காதலிப்பதை அறிந்து ஷாக் ஆகிறார். அவன் பெயர் முருகன் இல்லை சங்கத்தமிழன் என்று சொல்லி டுவிஸ்ட் கொடுக்கிறார். சங்கத்தமிழன் யார்? அவனின் பின்னணி என்ன? அவனை பார்த்து ராசி கன்னாவின் தந்தை அஞ்சுவது ஏன்? என்பதே மீதிக்கதை.
வித்தியாசமான கதைகளை தேர்ந்தெடுத்து நடித்து வந்த விஜய் சேதுபதி, இதில் இறங்கி அடித்து மாஸ் ஹீரோக்கள் வரிசையில் சேர்கிறார். கோபமும் ஆவேசமுமான சங்கத்தமிழனாக தன்னை முன்னிறுத்தும் விஜய் சேதுபதி, ஜாலியான, புத்திசாலித்தனமான முருகனாகவும் கலக்கி இருக்கிறார். டயலாக் பேசுவதில் தொடங்கி உடல்மொழி வரை வித்தியாசம் காட்டி இருக்கிறார். படம் முழுக்க அவருக்கு அறிமுக காட்சிகள் தான்.
ராசி கன்னா வழக்கமான கதாநாயகியாக வந்து காதலிக்கும் பணியை செய்கிறார். இன்னொரு கதாநாயகி நிவேதா பெத்துராஜ் காதலிப்பதோடு மட்டும் அல்லாமல் விஜய்சேதுபதிக்கு பக்கபலமாகவும் இருக்கிறார். சூரியின் காமெடி படத்தை கலகலப்பாக நகர்த்துகிறது. இரண்டாம் பாதியில் வரும் அந்த தொட்டி ஜெயா காமெடி வயிறை பதம் பார்க்கிறது.
நாசர், ஸ்ரீரஞ்சனி, மாரிமுத்து, கல்லூரி வினோத், லல்லு, ஸ்ரீமன், மைம் கோபி, ஜான் விஜய் ஆகியோர் பொருத்தமான கதாபாத்திரங்களாக கமர்சியல் படத்துக்கான வலுவை சேர்க்கிறார்கள். அசுதோஷ் ராணா, ரவி கிஷன் இருவரும் வில்லன்களாக மிரட்டி இருக்கிறார்கள்.
விஜய் சேதுபதியை மாஸாக காட்ட வேண்டும் என்பதில் கவனம் செலுத்திய இயக்குனர் விஜய் சந்தர், திரைக்கதையிலும் சற்று கவனம் செலுத்தி இருக்கலாம். வேல்ராஜின் ஒளிப்பதிவு படத்துக்கு பலம் சேர்க்கிறது. விவேக்- மெர்வின் இசையில் கமர்சியல் தூக்கல். பிரவீன் கே.எல். இன்னும் கொஞ்சம் கத்தரி போட்டு நீளத்தை கொஞ்சம் குறைத்திருக்கலாம். அனல் அரசுவின் சண்டை காட்சிகளில் அனல் பறக்கிறது.
மாஸ் கமர்சியல் படமாக இருந்தாலும் சமகால பிரச்சினையை புத்திசாலித்தனமாக நுழைத்ததால் சங்கத்தமிழன் கைதட்டி ரசிக்க வைக்கிறான்.
மொத்தத்தில் ‘சங்கத்தமிழன்’ கமர்சியல் விருந்து.