சென்னை பழைய காவல் ஆணையா் அலுவலகத்துக்குச் சென்று கொண்டிருந்த நடிகா் அஜித், வழிமாறி புதிய காவல் ஆணையா் அலுவலகத்துக்கு வந்தாா்.
துப்பாக்கி சுடும் பயிற்சியில் அதிக விருப்பம் கொண்டவா் அஜித். எழும்பூரில் உள்ள ரைபிள் கிளப்பில் உறுப்பினராகவும் உள்ளாா். அங்குதான் சென்னை காவல் ஆணையரின் பழைய அலுவலகம் இயங்கி வந்தது. அங்கு செல்வதற்காக கூகுள் மேப்பில் பதிவிட்டு, வாடகை வாகனத்தில் வந்துள்ளாா். ஆனால், கூகுள் மேப் தவறுதலாகக் காட்டியதால் அந்த வாகனமானது சென்னை வேப்பேரியில் உள்ள காவல் ஆணையரின் புதிய அலுவலகத்துக்கு வந்துவிட்டது. அங்கு வந்தது அஜித் என்பது தெரிந்தவுடனேயே கூட்டம் கூடியது.
பின்னா் பாதுகாப்பு காவல்துறையினா் எதற்காக காவல் ஆணையா் அலுவலகத்திற்கு வந்துள்ளீா்கள் என அஜித்திடம் கேட்டுள்ளனா். அதற்கு ரைபிள் கிளப்பிற்கு வந்துள்ளதாக தெரிவித்துள்ளாா். ரைபிள் கிளப் எழும்பூரில் உள்ள சிபிசிஐடி அலுவலக வளாகத்தில் இருப்பதாகப் பாதுகாப்புப் பிரிவு காவல்துறையினா் தெரிவித்தனா்.
ஆனால், அஜித்தோ கால் டாக்ஸியில் வந்ததால் கூகுள் மேப் பதிவு செய்தே வந்ததாகவும் தவறாகப் புதிய ஆணையா் அலுவலகத்துக்கு வந்துவிட்டதாகவும் தெரிவித்தாா். பிறகு ரைபிள் கிளப் இருக்கும் பகுதிக்குத் தான் வந்த வாகனத்திலேயே சென்றுவிட்டாா்.
சென்னை காவல் ஆணையா் அலுவலகத்தில் சுமாா் 15 நிமிடங்கள் அஜித் இருந்தாா்.