அயர்ன் சிட்டியில் பேராசிரியராக இருக்கும் கிறிஸ்டோபர் வால்ட்ஸ், அங்கு உடற்பாகங்களை இழந்து தவிப்பவர்களுக்கு, தேவையான செயற்கைக் கருவிகளை பொருத்தும் வேலையை செய்து வருகிறார். தனக்கு தேவையான பாகங்களை சேகரிக்க செல்லும் இடத்தில் வால்ட்சுக்கு அலிடாவின் தலையை கிடைக்கிறது.
இதையடுத்து இறந்துபோன தனது மகளின் செயற்கை உடற்பாகங்களை அலிடாவுக்கு பொருத்தி உயிர்பிக்கிறார். தனது பழைய நினைவுகளை மறந்த நிலையில் உயிர்பெறும் அலிடாவுக்கு அற்புத சக்திகள் இருக்கின்றன.
மறுபுறத்தில் நாயகன் கீன் ஜான்சன் உதிரி பாகங்களை திருடி விற்று வருகிறார். அலிடாவுக்கும், கீனுக்கும் நட்பு ஏற்படுகிறது. பின் இவர்களது நட்பு காதலாக மாறுகிறது. இந்த நிலையில், அந்த நகரில் சிறப்பாக இருக்கும் அனைத்தையும் அடைய நினைக்கும் மெஹர்சலா அலி, அலிடாவின் இதயத்தை திருட நினைக்கிறார்.
இந்த தகவல் அலிடாவுக்கு தெரிய வர, அவள் தனது எதிரிகளை அழிக்க நினைக்கிறாள். அதே நேரத்தில் தனது பழைய நினைவுகளையும் பெற முயற்சிக்கிறார்.
கடைசியில், அலிடா தனது எதிரிகளை அழித்தாளா? பழைய நினைவுகள் அலிடாவுக்கு திரும்ப வந்ததா? அலிடா – கீன் இணைந்தார்களா? என்பதே படத்தின் மீதிக்கதை.
மனிதன் – இயந்திரத்திற்கு இடையேயான காதலை சிறப்பாக காட்சிப்படுத்தியிருக்கிறார் இயக்குநர் ராபர்ட் ரோட்ரிகஸ். படத்தில் இடம்பெற்றுள்ள ஆக்ஷன், காதல் காட்சிகள் ரசிக்கும்படியாக வந்திருக்கிறது. படத்தில் அனைத்து கதாபாத்திரங்களும் சிறப்பாக பணியாற்றியிருக்கிறார்கள். படத்தை 3டி-யில் பார்க்க ரசிக்கும்படி இருக்கிறது.
ஜங்கி எக்ஸ்.எல்.-ன் பின்னணி இசையும், பில் போப்பின் ஒளிப்பதிவும் சிறப்பாக வந்திருக்கிறது. ஸ்டீபன் இ.ரிக்வினின் படத்தொகுப்பு கச்சிதம்.
மொத்தத்தில் `அலிடா பெட்டல் ஏஞ்சல்´ ஆக்ஷன் அதிரடி.